Urwego rw’igihugu rw’Ubugenzacyaha (RIB) ruratangaza ko rwafashe abantu bane aribo; Niyomungeri Richard, wahoze ari Umunyambanga Nshingwabikorwa w’Umurenge wa Nzige mu Karere ka Rwamagana, Kwisinga Jean Norbert, ushinzwe imiturire mu Karere ka Rulindo, Ishimwe Frank, ushinzwe imitangire y’ibyangombwa byo kubaka mu Karere ka Ngoma na Ntirenganya Epimaque, wakoraga nk’umuyobozi wa One Stop Center y’ubutaka mu Karere ka Gakenke.

Aba bakurikiranweho ibyaha byo gukoresha ububasha bahabwa n’amategeko mu nyungu zabo bwite no kutubahiriza igishushanyo mbonera cy’imikoreshereze y’ubutaka, aho bagiye batanga ibyangombwa byo kubaka ku bantu batandukanye batubahirije igishushanyo mbonera cyemejwe.

Mu gihe hategurwa dosiye kugira ngo ishyikirizwe ubushinjacyaha, iperereza rirakomeje kuri ibi byaha aho byaba bikorerwa hose mu gihugu.

RIB irongera kuburira abatanga ibyangombwa byo kwubaka bitubahirije ibisabwa n’amategeko bagamije inyungu z’abantu bwite kubihagarika kuko bibangamiye imigendekere myiza y’imyubakire mu gihugu kandi bikaba bihanwa n’amategeko.

Leta ya Iran yatangaje ko Amerika nisubukura ibitero mu ntambara imaze amezi abiri, izagabwaho ibitero bikomeye, ndetse ikomeza gushimangira ifungwa ry’umuhora wa Hormuz.

Umuhora wa Hormuz unyuramo 20% by’ibikomoka kuri peteroli umaze amezi abiri ufunze kubera intambara Amerika na Israel byashoje kuri Iran ku wa 28 Gashyantare 2026. Byatumye ibikomoka kuri peteroli ku Isi bihenda.

Impande zombi zatangiye ibiganiro ariko icyiciro cya kabiri gikomwa mu nkokora n’uko Perezida Trump yahisemo kubuza itsinda ryari guhagararira Amerika kujya muri Pakistan ahabera ibiganiro.

Gusa ariko hari amakuru avuga ko mu by’ukuri atari Trump wabujije izi ntumwa za Amerika kujya mu bihaniro, ko ahubwo Iran ari yo yafashe umwanzuro wo kutajyayo nyuma yo kubona koi bi biganiro bisa n’imikino kuri Amerika.

Ku wa 30 Mata 2026, byari biteganyijwe ko Perezida Trump agezwaho gahunda y’ibitero bishya bigomba kugabwa kuri Iran hagamijwe kuyihatira kwemera ingingo zikubiye mu masezerano Amerika yifuza ko basinya ngo intambara ihagarare.

Umuvugizi wa Minisiteri y’Ububanyi n’Amahanga ya Iran, Esmaeil Baghaei yatangaje ko bitari ngombwa kwitega ibisubizo byihuse mu biganiro na Amerika.

Umwe mu bayobozi bakuru b’igisirikare (Iran’s Revolutionary Guards) yavuze ko mu gihe Amerika yakongera kugaba ibitero kuri Iran, na yo yayisubiza igaba ibitero byinshi ahari ibirindiro by’ingabo za Amerika mu Burasirazuba bwo Hagati.

Umuyobozi w’Ingabo zirwanira mu Kirere, Majid Mousavi we yagize ati “twabonye ibyabaye ku birindiro byanyu mu karere, tuzabona ibisa nka byo ku bwato bwanyu bw’intambara.”

Umuyobozi w’Ikirenga wa Iran, Mojtaba Khamenei mu butumwa yandikiye abaturage ba Iran, yavuze ko bazakomeza kubuza umwanzi gukoresha nabi inzira y’amazi kandi bazakomeza kuyigenzura.

Ku wa Kane tariki ya 30 Mata ni bwo Urwego Rushinzwe Imari muri Leta Zunze Ubumwe za Amerika rwatangaje ko rwafatiye ibihano Kabila, nyuma yo kumushinja gutera inkunga ihuriro rya AFC/M23 rirwanya ubutegetsi bwa RDC.

Uyu mugabo wayoboye kiriya gihugu mu gihe cy’imyaka 18 biciye mu itangazo ryasohowe n’ibiro bye, yavuze ko “yakiranye gutungurwa” kiriya cyemezo, avuga ko ari “icyemezo kidafite ishingiro rikomeye, gifite impamvu za politiki kandi gishingiye ku birego bidafite ibimenyetso bidashidikanywaho.”

Ibiro bya Kabila byavuze ko kuva muri 2001 ubwo yafataga ubutegetsi kugeza muri 2019 ubwo yabuvagaho, yitangiye ibikorwa byo kongera kunga igihugu, kugarura amahoro buhoro buhoro, kunga Abanye-Congo, kubaka bundi bushya Leta no kugarura ituze mu karere k’Ibiyaga Bigari.

Byavuze ko ku butegetsi bwe ari bwo RDC yavuye mu ntambara y’akarere yari yarayisenye bikomeye, isubirana ubumwe bw’inzego za Leta, kandi igira ku nshuro ya mbere mu mateka yayo ihererekanya ry’ubutegetsi mu mahoro kandi mu buryo bwubahirije umuco wa demokarasi.

Ku bwa Joseph Kabila, icyemezo cya Amerika “kiratangaje cyane kubera ko gishingiye ku bivugwa n’ubutegetsi bwa Kinshasa butigeze bushobora gutanga ibimenyetso bifatika bishyigikira ibyo bwamushinje imbere y’ubutabera bwa gisirikare bwa Congo bukorera mu kwaha kwabwo.”

Joseph Kabila yongeye gushimangira ko ashyigikiye ubumwe bw’igihugu, ubusugire bwacyo, amahoro mu gihugu cye no mu karere k’Ibiyaga Bigari, ndetse n’igisubizo cya politiki kirimo bose ku kibazo cya Congo.
Uyu munyapolitiki yasabye ko uruhare rwa Leta Zunze Ubumwe za Amerika rwagira umumaro ugaragara mu gushaka igisubizo kirambye ku bibazo byugarije Congo, bitari iby’umutekano gusa kandi bitareba gusa uburasirazuba bw’igihugu.

Umusore witwa Nshimiye ufite imyaka 21 wo mu mu Murenge wa Mukura, Akarere ka Rutsiro, yakubiswe n’inkuba ubwo yari aryamye arapfa.

Ibi byabereye mu Mudugudu wa Rukondo, Akagari ka Kageyo, mu masaha y’ijoro rishyira ku wa 30 Mata 2026.
Umuvugizi wa Polisi mu Ntara y’Iburengerazuba, SP Sylvestre Twajamahoro yemeje iby’aya makuru.

Yemeje ko koko inkuba yakubitiye uyu musore iwabo aryamye.

Yaboneyeho gusaba abaturage kwibuka ko mu bihe by’imvura bakwiye kwirinda kugama munsi y’ibiti, gucomeka ibyuma ku mashanyarazi nka telefoni, gufata ku byuma cyangwa kugenda mu mvura, n’abana kudakinira mu bidendezi by’amazi igihe imvura igwa.

Umurambo wa nyakwigendera wajyanwe ku bitaro bya Murunda gukorerwa isuzma mbere y’uko ushyingurwa.

Itsinda ry’abakozi bane b’Ibitaro by’Akarere bya Nyanza, barimo umuganga n’ababyaza batatu, batawe muri yombi bakekwaho guha serivisi mbi umubyeyi witeguraga kubyara bikamuviramo ingorane.

Ibi byabaye mu 2025, ariko umubyeyi ageza ikirego ku Rwego rw’Igihugu rw’Ubugenzacyaha (RIB), vuba, abo baganga bahita batabwa muri yombi ku wa 28 Mata 2026.

Bivugwa ko hari umubyeyi wari ugiye kubyara, ajya ku Bitaro by’Akarere bya Nyanza, ntiyitabwaho uko bikwiye n’abaganga, ibyatumye umwana we avuka atuzuye ndetse hashize igihe gito arapfa.

Nyuma y’uko Perezida Kagame anengeye abaganga bo mu Bitaro byo mu Karere ka Karongi bahaye serivisi mbi umubyeyi wari utwite agapfa, ibi byahise bikangura uyu mubyeyi ahita ajya kurega abaganga bo mu Bitaro bya Nyanza, ngo babibazwe.

Aba baganga bahamagajwe kwitaba ubugenzacyaha, kuri sitasiyo ya RIB, Ishami rya Busasamana riherereye mu Karere ka Nyanza, maze bahita batabwa muri yombi ngo bakorweho iperereza.

Umuyobozi w’Agateganyo w’Akarere ka Nyanza, Kajyambere Patrick, yavuze ko abo baganga bamaze iminsi itatu bafunze, aho bari gukorwaho iperereza.

Yakomeje avuga ko abaturage bakwiye gukomeza kugaragaza aho babona serivisi zitameze neza bakahagaragaza, yibutsa n’abatanga serivisi kujya bashyira umutima ku kazi kabo mu gukomeza guharanira iterambere igihugu kirangamiye.

Leta Zunze Ubumwe za Amerika zabuze ayo zicira n’ayo zimira, zasabye ibihugu bitandukanye kuyifasha gufungura Umuyoboro wa Hormuz wafunzwe n’ingabo za Iran zigamije kugira ngo udacamo ubwato butwara ibikomoka kuri peteroli ku isoko mpuzamahanga.

Ubu busabe bwatanzwe mu gihe igiciro cy’ibikomoka kuri peteroli gikomeje gutumbagira, kuko igiciro cy’akagunguru kabyo karenze cyarenze Amadolari 120, kandi hari impungenge ko iri zamuka rizakomeza mu gihe Hormuz itafungurwa.

Minisiteri y’Ububanyi n’Amahanga ya Amerika yagaragaje ko ibihugu bizagira uruhare mu ifungurwa rya Hormuz bizahurira mu ihuriro ryahawe izina ’Martime Freedom Construct’ rizaba rifite ububasha bwo gukumira icyo ari cyo cyose cyahagarika ubwato bunyuramo.

Ibiro ntaramakuru Reuters byatangaje ko ibihugu birimo u Bufaransa n’u Bwongereza byaganiriye niba byajya muri iri huriro, byanzura kurijyamo ariko nyuma y’intambara ya Amerika na Iran yatangiye tariki ya 28 Gashyantare 2026.

Iran yatangiye guhagarika ubwato bunyura muri uyu muyoboro ubwo Amerika na Israel byayishozagaho iyi ntambara. Ibi byahungabanyije bikomeye isoko mpuzamahanga ry’ibikomoka kuri peteroli, ibiciro byabyo bitangira kuzamuka.

Muri Mata 2026, Amerika na yo yatangiye gukumira ubwato buturuka ku byambu bya Iran mu kigobe cya Persique, mu rwego rwo kuyishyiraho igitutu kugira ngo ifungure uyu muyoboro unyuramo 20% by’ibikomoka kuri peteroli.

Ku wa 29 Mata, Iran yatangaje ko mu gihe umutekano wayo ukibangamiwe, izakomeza gufunga Hormuz, kandi ko Amerika nikomeza guhagarika ubwato buva ku byambu byayo, izafata ingamba zikomeye za gisirikare.

Urwego rw’iki gihugu rushinzwe imari ni rwo rwatangaje ko rwafatiye ibihano uriya mugabo wayoboye Congo Kinshasa mu gihe cy’imyaka 18.

Ni nyuma y’uko Leta ya RDC yakunze kumushinja guha ubufasha inyeshyamba zo mu mutwe wa M23 umaze imyaka irenga ine uri mu ntambara na yo.

Mu mwaka ushize Urukiko Rukuru rwa Gisirikare muri RDC rwakatiye Kabila igihano cy’urupfu, nyuma yo kumuhamya ibyaha birimo kugambanira igihugu, kujya mu mutwe ugambiriye gukuraho ubutegetsi ndetse n’ibyaha byibasiye inyokomuntu. Byari nyuma yo kugaragara mu mujyi wa Goma ugenzurwa na M23.

Usibye kumukatira urwo gupfa, Leta ya RDC yafatiriye imitungo ye yose ndetse inasesa ishyaka rye rya PPRD.
Amerika ivuga ko “yagarutse muri RDC afite umugambi wo guhungabanya Guverinoma ya Congo binyuze mu guha ubufasha AFC/M23”.

Ivuga kandi ko yaba yarahaye ubufasha bw’amafaranga AFC mu rwego rwo kugira ngo uruhare rwayo rwa Politiki rugaragare mu burasirazuba bwa RDC.

Washington kandi yamushinje kuba yarashishikarije abasirikare bo mu ngabo za Leta ya Congo (FARDC) kuzivamo bakiyunga kuri AFC, ndetse no kuba ari gutegura kugaba ibitero kuri FARDC aturutse mu mahanga.
Ikindi ngo ni uko yaba yaragize uruhare mu gushyiraho umunyapolitiki utavuga rumwe na Perezida uriho, kugira ngo yisubize ijambo muri Guverinoma.

Ku bwa Washington, Kabila “yafashize AFC na M23 mu buryo bw’ibikoresho, ayitera inkunga; cyangwa ayiha ubufasha bw’ibikoresho, amafaranga, ikoranabuhanga cyangwa ubw’ibikoresho na serivisi.”

Kabila ntacyo aratangaza kuri biriya bihano, icyakora uyu mugabo amaze igihe agaragaza ko ubutegetsi bwa Perezida Félix Antoine Tshisekedi yita ubw’igitugu bugomba kuvaho, nyuma yo kubushinja kuba bukomeje gukora amabi menshi no kubabaza abanye-Congo.

Umuyobozi muri Polisi y’u Burundi ikorera hafi y’umupaka w’u Rwanda mu gace ka Mparamirundi ko muri Komine ya Kayanza ho mu ntara ya Butanyerera, ku wa Gatatu tariki ya 29 Mata yarashe mu cyico abagabo babiri bakekwaho gukorera ubucuruzi bwa magendu hagati y’u Burundi n’u Rwanda.

SOS Médias Burundi yatangaje ko amasoko yayo yo muri Polisi y’u Burundi ndetse n’umwe mu bafitanye isano na ba nyakwigendera bayibwiye ko abo bagabo mbere yo kwicwa bari babanje gutabwa muri yombi na Polisi y’u Burundi.

Amakuru aturuka muri Polisi yo gace barasiwemo avuga ko inzego z’ubuyobozi muri ako gace zashyizeho amabwiriza y’uko umuntu wese uzafatwa yinjiza mu Burundi ibicuruzwa bya magendu abikuye mu Rwanda agomba kwicwa.

Agace ka Mparamirundi kegereye umupaka w’u Burundi n’u Rwanda, kamaze igihe gafatwa nk’imwe mu nzira inyuzwamo ibicuruzwa bya magendu hagati y’ibihugu byombi.

Ubu bucuruzi bivugwa ko bwiyongereye ku ruhande rw’u Burundi, nyuma y’uko iki gihugu gifashe icyemezo cyo gufunga imipaka yose yo ku butaka igihuza n’u Rwanda.